Brødrene Aa har gjennom ei årrekke bygd og levert moderne og energieffektive batterielektriske passasjer- og turistbåtar til både den norske og internasjonale marknaden.

I 2023 inngjekk Brødrene Aa kontrakt med Norled om levering av tre hybrid-elektriske passasjerbåtar til sambandet mellom Trondheim og Kristiansund. Båtane skulle utrustast med Norled sitt eige SHIFTR-batteribyttesystem.

Dessverre har systemet blitt sterkt forseinka, og det er skuffande at det ikkje vil bli teke i bruk som føresett. I tillegg har forseinkingar og redusert fart på det første fartøyet gjort det naudsynt å vurdere alternative løysingar. Det har mellom anna vore dialog med Norled om å bygge om fartøya til energieffektive dieseldrivne båtar med opptil 36 knop fart.

VIL KANSELLERE KONTRAKT
Denne veka har Norled varsla at dei vil kansellere kontrakten på det første fartøyet. Dette set verftet i ein krevjande situasjon. På bakgrunn av dette har Brødrene Aa sett seg nøydd til å sende ut

permitteringsvarsel til alle tilsette medan ein går gjennom situasjonen i detalj og vurderer nødvendige tiltak vidare. Det er eit håp om å finne løysingar som kan gjere det mogleg å unngå at permitteringane vert sett i verk.

Brødrene Aa har, i tillegg til dei tre kontraktane med Norled, signert fem skipsbyggingskontraktar for levering fram til sommaren 2026. Det er særs viktig å finne løysingar som sikrar langsiktig drift og at desse prosjekta vert gjennomførte som planlagt.