UT 767CD Island Wellserver er kåra til Årets Skip 2008. Statssekretær i nærings- og handelsdepartementet, Rikke Lind, stod for overrekkinga av prisen på den internasjonale skipsfartsmessa i Hamburg tidlegare i dag, og juryen gratulerer med det dei betegnar som eit avansert og grensesprengande fartøy.

Det er bladet Skipsrevyen som står bak kåringa. Island Wellserver er av Rolls-Royce design, type UT 767CD, og vart bygd av Aker Yards, Langsten for Island Offshore. Fartøyet vart levert våren 2008, og er no på oppdrag for StatoilHydro.

- Vi i Rolls-Royce har gått steg for steg saman med Island Offshore i dette prosjektet, og vi er minst like stolte av det nye flaggskipet som redar og verft, seier Svein Kleven, design sjef ved Ship Technology- Offshore. - Dette har vore ein vinn-vinn situasjon der vi alle har heva vår kompetanse saman. Å få ein slik anerkjenning for arbeidet vi har gjort, gjer veldig godt. Vi er stolte av designet vårt, og mange timars arbeid ligg bak. I dag har vi lov å lene oss litt tilbake, og vere fornøgde med jobben som er gjort.

I si grunngjeving legg juryen særleg vekt på at Island Wellserver opererer i eit nytt markedssegment, og at teknologien som må på plass for at eit skip skal kunne utføre lett brønnintervensjon er banebrytande. Dei seier vidare at det er ei bragd å gjennomføre dette, og skipet illustrerer den ledande rolle Noreg har, også internasjonalt, innan maritim innovasjon. Dette er kun mogleg fordi Noreg har rederi- og fagmiljø som er villige til å strekke seg mot markedsmessige og teknologiske horisontar. At skipet er bygd 100 % til norske forhold hevar det over andre tilsvarande innretningar, og vart vektlagt av juryen.