Samferdselsminister Liv Signe Navarsete skal vere gudmor for ankerhandterings- og konstruksjonsskipet Olympic Zeus ved skipsdåp i Ålesund 21. mars.

- Det er ei stor ære for meg å få lov til å vere gudmor for dette skipet som representerer verdsleiande maritim teknologi. Det er nettopp nybygg av denne typen som gjer oss nordmenn stolte, og minnar oss om at Noreg framleis er ei stormakt på havet, seier samferdselsminister Liv Signe Navarsete.

Reiar Stig Remøy gler seg til å sjå Navarsete knuse sjampanjeflaska i skutesida på Olympic Zeus og til å ha henne som borddame på festen etterpå.

- Offshoreindustrien er kanskje den aller viktigaste distriktsnæringa vi har i Noreg. Det er rett og slett framtida til Kyst-Noreg. Vi borar, legg rør og lagar infrastruktur på havbotnen, medan samferdselsministeren styrer infrastrukturen på land, seier reiar Stig Remøy i Olympic Shipping.

Olympic Shipping har hatt stor fokus på å utvikle framtidsretta fartøy som er drivstoffsparande og miljøvenlege. Olympic Zeus er av typen ULSTEIN A122 designa og levert av Ulstein.

Fartøyet vert det første med hybridanlegg utvikla av Ulstein Design. Hybridanlegget gjer at skipet kan skifte mellom dieselmekanisk og dieselelektrisk framdrift, og at ein kan kombinere dei to framdriftsformene i hybridmodus for å nå maksimal slepekraft og optimalt forbruk. Dette gir fartøyet store økonomiske og miljømessige fordelar i det arbeidet skipet skal utføre.

Dåpen finn stad på Skansekaia nordside i Ålesund klokka 13:00, og frå klokka 15.00 - 17:00 vert skipet ope for publikum.