Kuma Shipping har kontrahert to Ulstein P128, ein ny design som er utvikla for den delen av PSV-marknaden som er retta mot operasjonar i grunnare farvatn.

– Dette er ein design som kombinerer lavt drivstofforbruk og høg lasteevne til ein attraktiv pris, seier Ove Dimmen, som er områdesalssjef i Ulstein Design & Solutions.

– Vi ønskte å kome fram med ein design for ein mindre type plattform forsyningsfartøy (PSV) som kan forsyne borelekterar og riggar på ein meir økonomisk måte enn dei tradisjonelle offshorefartøya. Då tenkjer vi både i forhold til byggekostnader og driftskostnader, seier Dimmen.

Han og teamet hans har utvikla P128-designen med gode innspel frå mellom andre Kuma Shipping, som er basert i Hong Kong. Fartøya vil bli bygde ved eit kinesisk verft, og er planlagde for levering i 2014.

Skipa er 71,5 meter lange og 15 meter breie, med dødvekt på om lag 3000 tonn. Det 610 kvadratmeter store arbeidsdekket har plass til fire lengder med borerør. Lossesystema har blitt designa for sikker og effektiv lasting og lossing av fleire tørre og våte bulklastar på same tid. Dynamisk posisjonering (DP2) og automasjonssystem for maskineri og lasthandtering gir sikre og effektive operasjonar. Skipa vil bli utstyrte for 24 personar.