Laurdag 6. april vart konstruksjonsstøttefartøyet (CSOV) Olympic Boreas dokka ut frå dokkhallen ved Ulstein Verft. Skipet er basert på den nye TWIN X-STERN-løysinga - sjøens svar på 'firhjulsdrift', ifølgje reiarlaget.

Olympic Boreas er byggnummer 318 og det første av to søsterskip for Olympic. Som CSOV-skip skal skipa yte støtte til konstruksjonsprosjekt og utføre serviceoppdrag innan offshoreenergi.

Representantar frå reiarlaget og skipsverftet var til stades på utdokkinga for å sjå når skipet kom glidande ut frå dokkhallen.

– Det var flott å sjå på sjøsettinga av Olympic Boreas. Den framifrå kvaliteten på skipsbyggingsarbeidet som Ulstein har vist gjennom byggeprosessen er imponerande. Vi ser fram til å overta dette toppmoderne CSOV-fartøyet når det er ferdigstilt til sommaren. Skipet er utstyrt med det nyaste av teknologi som kan mogleggjere berekraftige operasjonar, fortel VP Commercial / Renewables Frode Andreassen i Olympic.

PROSJEKTSTATUS
– Utrustingsarbeidet, som femner om innreiing, elektriske installasjonar, rørarbeid og mekaniske installasjonar er godt i gang. Utvendig malingsarbeid vart ferdigstilt medan skipet oppheldt seg i kontrollerte omgjevnader inne i dokkhallen. Vi har også kome i gong med oppstartsstadiet i prosjektet, fortel prosjektleiar Helge Torvik i Ulstein Verft.

Om fartøya

• Kontrakten mellom Olympic og Ulstein vart signert i 2022 og inneber bygging av to CSOV-skip ved Ulstein Verft. Skroga vert bygde ved Crist-verftet i Polen. 
• Fartøya har dieselelektrisk framdrift med variabelt turtal i kombinasjon med store batterisystem.
• Ulstein Power & Control skal levere ein omfattande kraft- og automasjonspakke, inkludert ein stor batterileveranse til skipa.
• Fartøya er baserte på ULSTEIN SX222-designet frå Ulstein Design & Solutions AS. 
• Dei har ei lengd på 89,6 meter og ei breidd på 19,2 meter og har plass til 126 personar fordelte på 91 utvendige lugarar med dagslys.
• Skrogforma og det hybride framdriftssystemet vil sikre høge operasjonelle ytingar, gode sjøeigenskapar og redusert avtrykk.

Om selskapa

• Fosnavågreiarlaget Olympic har ein flåte som opererer i marknaden for subseaservice og fornybar energi. 
• Ulstein Group er ei gruppe maritime selskap med hovudkontor i Ulsteinvik.