Skroget til kabelleggingsfartøyet (CLV) Nexans Electra er no sjøsett frå dokkhallen ved Ulstein Verft, eit viktig steg på vegen mot ferdigstilling. I løpet av tida ved Ulstein  Verft har skroget vore under tak i dokkhallen i eit kontrollert miljø, som gir optimale forhold for arbeidsmiljø og kvalitet på malingsarbeidet.

Sjøsettinga er meir enn eit punkt i prosjektlogistikken, det markerer eit symbolsk steg i bygginga av eit fartøy som skal spele ei nøkkelrolle i å realisere Nexans sin visjon om å elektrifisere framtida. Nexans er ein global, leiande aktør innan design og produksjon av kabelsystem og tenester for havvindprosjekt og undersjøiske samband. Når skipet no har blitt flytta frå dokkhallen til utrustingskaia, er det eitt steg nærare til å bli ein sentral ressurs i den globale energiomlegginga ved å legge undersjøiske kablar som koplar fornybare energikjelder til verdas kraftnett.

Fartøyet nærmar seg slutten av utrustingsfasen, som har inkludert installasjon av kritiske system som hovudgeneratorar, kraftpakke, dekksmaskineri og dekksutstyr. Sjøsettinga markerer starten på ferdigstillinga med dei siste installasjonane og målingsarbeidet, før alle system skal testast og justerast fram mot prøvetur våren 2026.

EIT FARTØY BYGD FOR FRAMTIDAS ENERGIBEHOV
Nexans Electra er utvikla for å møte den aukande etterspurnaden etter høgspent undersjøiske kabelinstallasjonar, som er avgjerande for havvindparkar, samband og elektrifisering på store djup. Med kapasitet til å leggje opp til fire kablar samtidig og ein total kabelkapasitet på 13 500 tonn fordelt på tre kabelkarusellar, er Electra konstruert for effektivitet, presisjon og robustheit  sjølv under dei mest krevande maritime forhold.

Ulstein Verft

• Ulstein Verft sine fasilitetar og breie kompetanse innan skipsbygging sikrar presisjon, kvalitet og levering til rett tid, og styrkar Noreg si rolle som ein viktig bidragsytar til berekraftige maritime innovasjonar.
• Dokkhallen gir høg kvalitet på arbeidet, med ein finish som stettar dei strengaste industristandardane, noko som er avgjerande for fartøyet si levetid og yting i krevande offshoremiljø.
• Verftet held til i Ulstein Group sitt hovudkontor med dei fleste fagfelt innan kort rekkevidde.