Stadt Group og OMS Group har inngått ein strategisk samarbeidsavtale som skal styrkje posisjonen i den maritime marknaden i Polen. Målet er å levere meir av Stadt sine unike elektriske framdriftssystem til både kommersielle og militære skip.

Som del av avtalen vert  OMS – Offshore & Marine Services Poland Sp. z o.o. no den offisielle representanten for Stadt i Polen. OMS skal fremje Stadt sin patenterte Lean Propulsion®-teknologi – ei stillegåande, effektiv og miljøvennleg løysing for skipsframdrift.

VIKTIG MILEPÆL
– Denne avtalen er ein viktig milepæl i vår langsiktige satsing på den polske maritime marknaden, seier Hallvard Slettevoll, administrerande direktør og styreleiar i Stadt Group. – Gjennom samarbeidet med OMS kjem vi tettare på kundane våre og kan tilby betre lokal oppfølging.

I tillegg til marknadsføring og sal skal OMS levere teknisk støtte og service til både nye og eksisterande kundar. Dette skal sikre rask og kompetent service med lokal tilstadevering.

VERDSLEIANDE TEKNOLOGI
– Vi er stolte over å representere Stadt i Polen, seier Agnar Førde, administrerande direktør og styreleiar i OMS Group. – Samarbeidet gir oss moglegheit til å tilby kundane våre berekraftige og driftssikre løysingar basert på verdsleiande teknologi, kombinert med lokal gjennomføringsevne.

Partnarskapet inneber også felles marknadsinitiativ, deling av teknisk kompetanse og samarbeid om utvikling av tenestetilbod både i Polen og innanfor selskapa sine øvrige verksemder i Noreg og internasjonalt.