Sinopacific-verftet Zhejiang i Ningbo, Kina, har inngått ein kontrakt med Ulstein på leveransar av tolv designpakkar til plattform forsyningsfartøy av Ulstein sin PX105-design for selskapet Seatankers Group.

– Seatankers Group er ein ny kunde for Ulstein, seier administrerande direktør Sigurd Viseth i Ulstein Design & Solutions AS. – Vi synest det er hyggeleg at dei vel våre design, og vi har stor tru på at dette vert kostnadseffektive og nyttige skip for dei, kommenterer han.

– Totalt har Sinopacific sidan 2007 og fram til no inngått kontraktar på heile 22 designpakkar med Ulstein-design. På dei fleste prosjekta ved verftet deira har alle partar nytt godt av byggeoppfølging frå Ulstein. Eit eige prosjektteam har vore på staden og følgt heile prosessen, noko som har ført til at bygginga har gått smidig. Vi trur at også Seatankers Group vil sjå fordelane av at vi har sterke relasjonar med byggeverftet for dei tolv nye fartøya bestilte ved Sinopacific, fortel Viseth.

Kontrakten inkluderer ei omfattande utstyrspakke på design, engineering og utstyr. Skipa vert 88,9 m lange og 19 m breie. Dei vert utstyrte med dieselelektrisk framdriftssystem, og ei omfattande elektropakke frå Ulstein Power & Control. Dei får Azipull 100-propellar, og vil kunne halde ei fart på 15,5 knop. Lastedekksarealet vert på i overkant av 1000 m² og skipa får ei dødvekt på 4700 tonn. Dei vert klassifiserte etter Clean og Clean Design-standardane frå Det Norske Veritas (DNV).

Medrekna denne kontrakten, har Ulstein selt til saman 26 fartøy av designtypen PX105. Dette er ein X-Bow-skroglinjedesign, som har fått svært gode tilbakemeldingar frå mannskap som arbeider om bord på fartøy av denne typen. X-Bow-fartøya sparer drivstoff og kan oppretthalde høg fart også i røffe vêrforhold. Til saman 62 skip med X-Bow-designen er selde sidan lanseringa i 2005.