Ulstein Power & Control har fått i oppdrag å levere ei komplett power- og styringspakke til fire plattform forsyningsskip. To av skipa er underbygging ved ETP-verftet i Brasil, medan to skal byggast ved Ulstein Verft i Ulsteinvik.

Ulstein Power & Control (UPC) har totalansvaret for systemintegrasjonen i dei fire skipa, noko som inneber at selskapet skal kvalitetssikre og følgjeopp kravspesifikasjonane for skipa.

– Vi planlegg kva utstyr som passar i skipa ut frå krava til fart, økonomi og driftsprofil. Ut frå dette skal vi levere ei komplett power- og styringspakke, som også inkluderer ei powerløysing for elektrisk propulsjonsom vi har arbeidd med over tid, fortel Egil Rødskar, som er produktsjef powerløysingar i UPC. – Det er powersystemet som produserer og distribuerer energi og drivløysingar til propellane, og dette må setjast saman på ein god måte slik at det kommuniserer godt, forklarar han.

– Skipa er kompakte plattformskip av typane Ulstein PX121 og P801. Samspel mellom elektroselskap og designselskap, og mot byggjeverfta, bidreg til få fram dei best eigna produkta. Rette val av produkt verkar inn på effektiviteten i produksjonsmetodar og byggemetodikk hos verfta, og tverrfagleg samarbeid aukar graden av innovasjon, understrekar Rødskar.

Administrerande direktør Gunnar H. Hide i UPC legg til at Ulstein Group har eit sals- og servicemiljø i Brasil som følgjer opp byggeprosjekta både på design- og systemløysingar. – Etter at skipa er leverte, har UPC også eit serviceapparat som følgjer opp skipa. Ulstein Group satsar stort på komplette, integrerte kontroll- og powersystem inkludert elektrisk propulsjon, og fokuserer på å byggje opp kompetansen i Ulsteinvik for å møte etterspurnaden etter slike system, fortel han.