Harding er tildelt kontraktar for ni FF1200 frittfall-livbåtar med tilhøyrande davitar på Heerema Offshore Services BV sitt halvt nedsenkbare kranfartøy Sleipnir. Fartøyet blir verdas største i sitt slag, og skal byggjast av Sembcorp Marine i Singapore.

Saman med feltsenteret til Johan Sverdrup-utbygginga i Nordsjøen, der Harding også er leverandør, er Heeremas Sleipnir eitt av berre ei handfull store, pågåande offshoreprosjekt.

– Alle snakkar om Sverdrup, men for oss er dette prosjektet like stort med like mange livbåtsystem, seier Oddgeir Mælen, regional salssjef i Harding i ei pressemelding.

– Leveransane er i hovudsak basert på offshoreteknologi, men Heerema-kontraktane gav likevel ein spesiell type utfordring. Det nye kranfartøyet vil operera globalt, så ei rekke relevante internasjonale standardar måtte takast omsyn til i valet av livredningsutstyr, forklarer Mælen.

FF1200 er ein 70-personars frittfall-livbåt som er designa etter DNV OS-E-406-standardane - dei strengaste i bransjen, med krav som langt overgår SOLAS-reglementet for frittfall-livbåtar. Livbåtane blir perfekt matcha med Harding sine davitsystem, spesialdesigna for FF1200.

Med Sleipnir-kontrakten bikkar Harding akkurat 100-merket for talet på leverte FF1200-livbåtar, og fartøy ypen har sikra seg posisjonen som favoritt i offshoreindustrien. Oddgeir Mælen meiner det er langt frå tilfeldig at Harding vart vald som leverandør til Heerema-prosjektet.

– Harding-livbåtane er industrileiande, og det er båtane våre som blir valde til dei mest krevjande prosjekta og dei klasseleiande fartøya, påpeikar han.