Hurtigruten Expeditions-skipet MS Maud kjem til Green Yard Kleven i juni 2021 for teknisk oppgradering og klargjering for ekspedisjonscruise. 

 -Dette er eit godt oppdrag for oss, det blir ein del tekniske oppgraderingar som passar fint inn med kompetansen og kapasiteten vi har på verftet, seier Kjetil Bollestad, CEO i Green Yard Kleven.

KLARGJERING TIL EKSPEDISJONSCRUISE 
Skipet er ein del av flåten til Hurtigruten Expeditions, og skal gjerast klart til å gå inn i ekspedisjonscruise-trafikken igjen. Green Yard Kleven skal utføre tekniske oppgraderingar, og vil i løpet av sommaren få skipet klargjort til ekspedisjon. 

 -Vi ønsker MS Maud velkommen til Green Yard Kleven, og tar det som ei tillitserklæring at vi har fått nok eit oppdrag frå Hurtigruten Expeditions, seier Bollestad. 

 HURTIGRUTEN EXPEDITIONS-FLÅTEN
MS Maud, tidlegare MS Midnatsol, har tidlegare segla både i rutetrafikken Bergen – Kirkenes og som ekspedisjonsskip, hovudsakeleg i Antarktis og Falklandsøyene. Frå 2021 blir ho ein del av ekspedisjonsskip-flåten til Hurtigruten Expeditions året rundt, og skal mellom anna segle ekspedisjonscruise på norgeskysten, Dei britiske øyene og Skandinavia. MS Maud er oppkalla etter den legendariske polarskuta Maud, som i sin tur var oppkalla etter dronning Maud.