Ulsteinkonsernet leverer eit svært godt resultat for fjoråret. Dei førebelse tala tyder på at konsernet hadde ein omsetnad på heile 3,21 milliardar kroner og eit driftsresultat på 364,4 millionar kroner i 2008. Fjorårsresultatet vert det beste frå Ulsteinkonsernet etter 1999.

- Det er eit lyspunkt å kunne presentere positive resultat i ei tid som er så økonomisk dyster for dei fleste. Nytenking og hardt arbeid vil vere ein del av Ulsteinkonsernet også i åra som kjem, men vi må være realistiske å innsjå at det kan bli tøft framover, seier konsernsjef Gunvor Ulstein i Ulsteinkonsernet.

- Våre ambisjonar er heilt klare. Vi har bak oss fleire år med gode resultat, noko som gjer at vi kan halde fram med å bygge eit robust konsern. Vi må også sjå etter muligheiter i tida som ligg føre oss. Våre mål er å utvikle fleire produkt og tenester som er i toppklasse internasjonalt, slik at vi er klare når marknaden snur og finanskrisa er over, seier Gunvor Ulstein.

Ved utgangen av 2008 var ordreboka på 5,5 milliardar kroner i Ulsteinkonsernet.

Ulsteinkonsernet sine førebelse hovudtal for 2008:

Driftsinntekter: 3,21 milliardar kroner (2007: 1,97 mrd kr)

Driftsresultat: 364,4 millionar kroner (2007: 193,7 mill kr)

Ordinært resultat før skatt: 431,1 millionar (2007: 240,8 mill kr)