Selskapet tilbyr det meste innan mekanisk utrusting, vedlikehald og reparasjon av ulike fartøy. A. Olufsen har òg spesialisert seg på utstyr som kan brukast på havbotnen.

Det bles friskt då me besøkte offshorebasen på Killingøy i Haugesund. På området er det sett opp ein høg mur mot nord som vern mot nordavind og høge bølgjer.

– Når vinden verkeleg tek tak, regnar det sjøvatn over bygningar og parkeringsplassar, fortel Arne Olufsen. Han er grunnleggjar, eigar og dagleg leiar i A. Olufsen Ship & Offshore.

Verksemda har i dag rundt 50 medarbeidarar og held til i ein bygning med stor verkstadshall på Killingøy-basen. Der er samla fleire base-tenester for offshoreflåten. Basen ligg strategisk til på fleire små, samanbygde holmar i innseglinga til Haugesund, med havet som næraste nabo.

Hit kjem ulike typar offshore-servicefartøy for å mobilisera utstyr til ymse kampanjar og prosjekt i havet. Forsyningsskip, ankerhandteringsfartøy og ikkje minst konstruksjonstøttefartøy eller subsea-fartøy utgjer i dag viktige brikker i kundemassen hos A. Olufsen.

SKREDDARSAUM
I tredje etasje sit Reidar Selvik og Vigdis Haukås, som begge er ingeniørar i serviceselskapet. Selvik fortel at han arbeider med å teikne ein ny port, som skal installerast om bord i eit offshorefartøy.

– Den gamle porten til ROV-hangaren om bord var blitt så øydelagd at han måtte bytast ut med ein ny. Til liks med kollega Haukås er Selvik også prosjektleiar og samarbeider tett med kollegaene i verkstaden i første høgda.

Vigdis Haukås er denne dagen oppteken med å utarbeide dokumentasjon til eit prosjekt som nærmar seg ferdigstilling.

Dagleg leiar Arne Olufsen fortel at dei produserer mykje mekanisk utstyr i stål og aluminium til subsea- og offshorefartøy.

– For ein stor del utfører me skreddarsaum og lagar spesialtilpassa komponentar og utstyr som det berre blir laga eitt eksemplar av.

Men verksemda framstiller også fleire eigne produkt i seriar. Mellom dei mest populære produkta er ein spesial-container for sikker transport av ymse utstyr om bord i offshorefartøy. Containeren er laga solid, samstundes som han er lett å betena for éin person ved lossing og lasting.

LIKAR IKKJE Å SEIA NEI
Sommarhalvåret er den travlaste tida. Då er det høgsesong med ulike byggje- og vedlikehaldsprosjekt på olje- og gassinstallasjonar på havbotnen i Nordsjøen.

– Når eit subseafartøy skal ut på feltet for å gjennomføra ein jobb, produserer me ein del av utstyret skipet skal ha med seg, seier Olufsen og held fram:

– Dessutan blir det ofte faste oppdrag med sjøsikring av utstyret før fartøyet går frå kai. Det tyder i praksis at store utstyrspakkar må sveisast fast i rammer om bord.

Etter at jobben er fullført til havs, kjem offshore-servicefartøya tilbake til basen på Killingøy. Då får A. Olufsen Ship & Offshore oppdraget med å ta utstyret på land, gjera det reint og utføra vedlikehald og reparasjonar. I tillegg blir det ofte produsert nye komponentar og heilt nytt utstyr til neste jobb som skal gjennomførast til havs.

– Eg likar ikkje å seia nei når kundar spør om me kan løysa eit oppdrag. Sjølv om oppdraget ser utfordrande og krevjande ut, gjeld det å sjå løysingar. Det er jo kundane me lever av, seier Olufsen.

CNC-OPERATØR FRÅ TYSKLAND
Nyleg investerte verksemda i ein flunkande ny CNC-maskin (Computer Numerical Control). Ein CNC-maskin er ei datastyrt maskin som blir brukt til å forma, kutta eller bearbeida materiale som metall, tre, plast eller aluminium med svært høg presisjon. Maskina har stor fleksibilitet når det gjeld storleiken både på emnet som skal bearbeidast og det endelege produktet. Det tyngste metallstykket som kan plasserast på CNC-maskina sitt bord, kan vega opptil 1,8 tonn.

Men ny teknologi i verkstaden kravde samstundes ny menneskeleg kompetanse, som kunne gjera full nytte av den nye investeringa. Ei annonse blei rykt inn i ein tysk publikasjon. Det førte til at ein erfaren CNC-operatør frå Tyskland melde si interesse. Jonny Gessner har styrt CNC-maskina på Killingøy dei siste 18 månadene. Han er fast tilsett, snakkar norsk og reknar med å bli verande i Norge.

– Før me fekk CNC-maskina på plass, laut me ut på bygda og gjera avtalar med andre verksemder om å utføra oppdrag for oss. Men då måtte me gjerne venta i fleire veker, ja opptil månader, før me fekk jobben gjort. Då svara dei store kundane våre at med slike leveringstider kunne me berre gløyma å få tildelt oppdraget, seier Olufsen.

VIKTIGE KUNDAR I NÆRMILJØET
I verkstadhallen er det elles rikeleg med avansert utstyr, som fleire datastyrte dreiebenkar, platebrennar og store valsar for valsing av stålplater. I ein eigen hall, nærare nordavinden og havbårene, står ein vass-skjeremaskin for kutting av plater ved hjelp av vasstrålar.

Viktige kundar hos A. Olufsen er undervassentreprenørar som DeepOcean, Reach Subsea og DOF. Alle desse har hovudbase eller avdeling i Haugesund. I tillegg kjem lokale offshore-reiarlag som Østensjø Rederi og Eidesvik Offshore.

Men det er ikkje berre reiarlag som er kundar. Andre verksemder innan mekanisk industri og andre nærskylde verksemder kjem med utfordringar til servicebedrifta på Killingøy.

– Me har jamvel fått førespurnad frå storebror, Aibel i Haugesund, eit av landets desidert største offshoreverft om eit visst samarbeid, seier Arne Olufsen.

BYGDE CRUISEFARTØY
Til neste år er det 50 år sidan verksemda starta. Olufsen var skipsbyggjemeister ved Karmsund Verft på Karmøy. Men aktiviteten blei mindre ved verftet, og skipsbyggjemeisteren fekk lyst til å starta noko for seg sjølv.

Som einmannsføretak fann han høveleg plass i ein nedlagd sildoljeefabrikk på Moksheim ved Karmsundet. I starten blei det mest reparasjon av ymse skadar på fiskefartøy. Oppgåvene blei etter kvart så mange at einmannsføretaket utvida staben med fire medarbeidarar. Oppdrag om bord i einskilde fiskebåtar kunne vera så omfattande at alt inventar i eitt tilfelle blei fjerna og nytt blei bygd på staden og installert om bord, fortel Olufsen.

Han minnest mange spennande og dels spektakulære oppdrag opp gjennom åra. Eit av dei mest omfattande og spesielle oppdraga var ombygginga av ein tidlegare rutegåande katamaran-passasjerbåt. Reiarlaget ønskte å byggja fartøyet om til cruisebåt, som skulle operera i Det karibiske hav. Men for å kunna gjera jobben mest mogleg effektivt laut fartøyet på land.

Olufsen fekk tak i eit kranfartøy som kunne løfta den 42 tonn tunge katamaranen opp på serviceverksemda sin kai. Der blei fartøyet totalt ombygd. Mellom anna blei passasjersalongen midtskips erstatta med ein lang bardisk.

HELG- OG NATTARBEID
Mange gonger har A. Olufsen stilt opp, sjølv i helgar eller jamvel midt på natta, når kundar trong hjelp.

Ein gong hadde ein av båtane til reiarlaget Paul Wilson fått ein stor skade i skipssida. Skipet gjekk i fast rute mellom hamner i Nord-Europa og nordover langs norskekysten. For å unngå for lang forseinking i ruta, ønskte reiarlaget reparasjon snarast råd.

– Me heiv oss rundt og skar ut eit 16 kvadratmeter stort felt av skutesida, som me erstatta med nye plater. Dette fekk me gjort i løpet av ei helg, fortel Arne Olufsen.

Han legg til at seinare blei reiarlaget Paul Wilson ein fast kunde.

Inngangen til offshore- og subseanæringa kom i stand då Stolt-Nielsen Seaway tok kontakt og ønskte bistand. Stolt-Nielsen Seaway, som heldt til i Haugesund, dreiv med metningsdykking for olje- og gassindustrien i Nordsjøen. Samarbeidet med dette selskapet gav stadig fleire oppdrag for A. Olufsen, som mellom anna sertifiserte medarbeidarane sine slik at dei kunne bli med Stolt-Nielsen Seaway sine dykkarskip offshore.

ARBEIDARAR FRÅ ROMANIA
Etter kvart som kravet til plass på land og djupne ved kai auka, flytta serviceselskapet fleire gonger til nye lokalitetar langs Karmsundet. Til sist blei Killingøy fast tilhaldsstad. Stolt-Nielsen Seaway hadde òg base der.

I dag har A. Olufsen 45 fast tilsette. Men i periodar leiger dei inn ekstra mannskap og kan då vera opp mot 60 personar på jobb samstundes.

I periodar har det vore vanskeleg å rekruttera nok fagfolk frå nærmiljøet. For om lag 20 år sidan reiste Olufsen til Romania for å leita etter flinke sveisarar, platearbeidarar og røyrleggjarar. Om lag 45 interesserte fagarbeidarar melde si interesse. Olufsen leigde seg plass i ein mekanisk verkstad for å testa dei interesserte i praksis.

Denne ekspedisjonen førte til at 20 rumenarar reiste til Norge og starta i jobb hos A. Olufsen. Dei fleste av desse er ved bedrifta den dag i dag, i faste jobbar og har slått rot i Haugesund-distriktet med kone, barn og familie.

– Men me rekrutterer framleis ungdomar frå distriktet rundt oss, og me har til ei kvar tid lærlingar, seier Arne Olufsen.

FAKTA
Selskap: A. Olufsen Ship & Offshore.
Type verksemd: Mekanisk bedrift som yter service til offshoreflåten.
Lokalisering: Haugesund.
Dagleg leiar og gründar: Arne Olufsen.
Eigar: Arne Olfusen.
Omsetnad i 2024: 84,9 mill. kr.
Resultat før skatt i 2024: 8,1 mill. kr.
Tal fast tilsette: 45.