Fjord1 MRF og Gasnor har inngått avtale om naturgassleveransar til seks ferjer i Romsdal og Trøndelag – som resulterer i store miljøgevinstar når ferjene kjem i drift i 2010 og 2011.

Naturgassavtalen, som har ein samla verdi på rundt 700 millionar kroner, er ei viktig miljøsatsing for selskapet som bygde verdas første gassferje i 2000, og som i 2007 sette inn dei fem neste gassferjene i landet. No kjem seks gassdrivne ferjer på ferjesambanda over Moldefjorden og Trondheimsfjorden.

Viseadministrerande direktør Frode Ohr i Fjord1 MRF viser til at gassferjedrift representerar ein betydeleg miljøgevinst. - Samanliknar ein alle gassferjene med konvensjonelle dieseldrivne ferjer, er NOx-utsleppa redusert med 90%, som tilsvarar meir enn dei samla utsleppa frå dagens personbilpark i Oslo, seier Ohr. Vidare seier han at fordi naturgass er eit reint drivstoff vil praktisk talt alle utslepp av partiklar (røyk/sot) samt alle utslipp av svovel fjernast.

Gasnor er pioner på å framstille og levere naturgass til skip. Administrerande direktør Eilef Stange bekreftar at selskapet leverer i dag flytande naturgass til åtte fartøy, og har inngått kontrakt på leveransar til ytterlegare 12 fartøy. Dei opplever stor interesse også frå utanlandske selskap for denne nye teknologien. - Ettersom kystflåten står for 40% av Norges NOx-utslepp, vert det viktig med nettopp slike tiltak frå næringslivet og styresmaktene dersom Norge skal oppfylle sine internasjonale plikter (Gøteborgprotokollen), seier Stange.