Ulstein har etablert eit nytt selskap, Ulstein IDEA Equipment Solutions. Dette selskapet skal overta aktivitetane til IDEA Heavy Equipment i Nederland, eit selskap som Ulstein har samarbeida med.

Ulstein IDEA Equipment Solutions skal jobbe med utvikling og produksjon av innovative løysingar og utstyr knytt til grensesnittet mellom båt og handteringsutstyr på dekk, hovudsakelig innan offshore og ”dredging” (mudring). Ulstein har majoritet i det nye selskapet og områdeleiar for Design & Solutions Tore Ulstein seier at etableringa er eit ledd i konsernets internasjonale satsing.

– Ulstein har sidan 2008 vore etablert i Nederland gjennom Ulstein Sea of Solutions. Ei vidare satsing i den nederlandske maritime klynga vil bidra til auka marknadskunnskap og innovasjonskraft. Dette skal styrke vår evne til å skape morgondagens løysingar for berekraftige marine operasjonar, seier Tore Ulstein.

I leiinga blir Arjan Boezeman og Gilbert Rezette. Dei skal jobbe tett saman med Bob Rietveldt som leiar Heavy Offshore segmentet i Ulstein.

Viktige marknader blir Brasil, Mexicogulfen, Vest-Afrika, Østen forutan den nordlege området inkludert Arktis, der Ulstein allereie er til stades. Det nye selskapet skal jobbe tett inn mot Global Sales Network i Ulstein.